Music of Love (22)

Chapter 1: Big and Little SisterChapter 2: To Love and To Lose HopeChapter 3: A Lesson of LoveChapter 4: Lost and FoundChapter 5: AcceptanceChapter 6: CoincidenceChapter 7: An Unforgettable MelodyChapter 8: Sense of DangerChapter 9: Confusion and QuestionsChapter 10: ConfessionChapter 11: Burst of EmotionsChapter 12: UnsungChapter 13: The Truth BehindChapter 14: The ConcertChapter 15: First Kiss, First HeartbreakChapter 16: Heaven is Being With YouChapter 17: The DreamChapter 18: Farewell and HelloChapter 19: Just a SubstituteChapter 20: Taking Back What’s MineChapter 21: The Friendship Ring
***Chapter 22
Discovery
     Hindi pa rin makapaniwala si Reed sa natuklasan niya tungkol sa pagkatao ni Trish. Maraming lihim ang babaeng iyon at ilan pa kaya ang karelasyon nito bukod kay Ivan? Nababahala tuloy siya sa ginagawang panloloko nito sa kaibigan.
     Patulog na sila. Isasara na lamang niya ang ilaw nang tanungin siya ni Benjo,
     “Kuya Reed, may nakita ka bang singsing kanina? Ipinatong ko kasi yun sa lamesa noong naghugas ako ng mga plato, pag tingin ko wala na.”     “Bakit? Gaano ba kaimportante yung singsing na yun?” tanong ni Reed.
     Hindi alam ni Benjo kung ano ang isasagot. Hindi naman niya maaaring sabihing ang singsing na iyon ay tanda lamang ng pagkakaibigan nila ni Ellie.
     “A kasi, yung singsing na yun... Yun ang sagisag ng pagsusumpaan namin ni Ellie na—na— na— na magmamahalan kami habang buhay!” pagsisinungaling niya. Hindi niya nga maderetso ang pagsasalita niya.
     Napataas ng kilay si Reed, “Habang buhay raw!” at sinabi niya kung ano ang nalalaman niya. Binuko niya si Benjo, “Hoy, Benjo! Bistado ka na! Akala mo ba hindi ko alam na friendship ring lang yun?”
     Gayunpaman, hindi nagpakita ng pagkagulat si Benjo at siya'y tumanggi sa paratang ni Reed. “Ha? Hindi a!” ang kanyang sinabi.
     “Ang sabihin mo, nagkukunwari lang kayo ni Ellie. Sabihin mo nga, Benjo, bakit kailangan ninyo pang magsinungaling at bilugin ang mga ulo namin? Sabi ninyo magkasintahan kayo, ‘di naman pala totoo!” bakas kay Reed ang pagkainis.
     Natawa si Benjo, “Anong sinasabi mo?”
     Masakit man ang sasabihin ni Reed ay kailangang malaman ni Benjo at isaksak sa isip nito na hindi siya ang nararapat kay Ellie.
     “Sinabi na ni ‘van kay Trish na si Ellie na ang mahal niya pero syempre, hindi naman pumayag na makipaghiwalay si Trish. ‘Insan, huwag mo na kasing ipagsiksikan ang sarili mo kay Ellie. Wala ka nang magagawa kung nagmamahalan silang dalawa ni ‘van. ‘Wag ka nang umepal!”
     Nasaktan si Benjo sa mga sinabi ni Reed. Si Reed pa man din ang naturingang pinsan niya pero ito pa ang numero unong humahadlang sa kaligayahan niya.
     “Nasasabi mo iyan kasi hindi mo nararamdaman ang nararamdaman ko! Pasalamat ka at wala kang kahati sa pagmamahal ni Neri. E ako? Paki sabi kasi riyan sa kaibigan mo na makuntento na lang kay Trish! At saka si Ellie naman ang may gusto nito. Sinusunod ko lang kung anong sinasabi niya,” kanyang hinanakit.
     Mukhang walang magandang patutunguhan ang usapang ito kaya't nagpasya si Reed na tumigil na sila sa pagtatalo at matulog na lamang.
     “Benjo, ayaw kong pag-awayan pa natin ang bagay na ito. Matulog na lang tayo, ok? Sorry,” paumanhin niya. Pinatay niya na ang ilaw. Nang tabihan niya si Benjo, narinig niya ang paghikbi nito. Huminga siya nang malalim at nagwika, “Napakahirap ng may kahati sa pagmamahal ng isang tao, alam ko naman iyon, Benjo, e!”
     Ngunit binaliwala lang siya ni Benjo, “Ewan ko sa iyo! Wala kang alam, Kuya Reed! Kumanta ka na lang. Doon ka naman magaling e!” Tumayo siya dala ang kanyang dalawang unan, kumot at cell phone.
     “Saan ka pupunta?” tanong ni Reed sa kanya.     “Ayokong makatabi ka!” sagot ni Benjo at padabog niyang isinara ang pinto.
     Kinabukasan, nakipagkita si Reed kay Lex para linawin ang ilang bagay pero bago sagutin ang mga katanungan ni Reed ay humirit si Lex ng isang kaha ng sigarilyo.
     “O, ano ang tanong mo, pogi?” tanong ni Lex. Nagsindi siya ng isang sigarilyo. Inalok niya si Reed ngunit tinanggihan siya nito.
     Tinanong na nga ni Reed ang bagay na bumabagabag sa kanya, “Natatandaan mo ba yung lalaking nakita nating kasama ni Trish sa mall?”
     Ibinuga ni Lex ang usok ng sigarilyong hinihithit, “Paano ko ba naman makakalimutan yun e siya yung gagong bumugbog sa akin?” 
     Nagulat si Reed. Isa kasing misteryo kung sino ang bumugbog kay Lex. “Siya ang bumugbog sa iyo? Bakit? Sino ba siya?” tanong niya.
     “Si Harold Lim!” sagot ni Lex. “Akala mo kung sinong mabangis na aso e matapang lang siya dahil kasama niya yung mga tuta niya.”     “Bakit ka naman niya binugbog?” tanong muli ni Reed. Nagpaliwanag naman si Lex.     “Alam mo kasi, inabangan ko siya sa mall para sabihin ang mga kalokohan ng bebot niya.”     “Kalokohan nino? Sinong bebot?” pag-uusisa ni Reed, animo'y walang alam.     “Sino pa edi yung malanding syota ni Ivan na kala mo e Santa Santita!” may halong galit at pagkainis na pagkakasabi ni Lex.     “Sandali, ibig mong sabihin e girlfriend nitong sinasabi mong Harold Lim si Trish?”
     Tumango si Lex, “Ganoon na nga, pogi, at alam mo ba kung ano ang sabi niyang Harold Lim na iyan sa akin? Sino raw ako, bakit ko raw sinisiraan ang syota niya. Tapos ayun, binunyag ko lahat ng kalokohan niyan ni Trish! At ang ginawa sa akin? Binugbog ako! Binugbog nila ako ng mga tuta niya.” Binalaan niya si Reed, “Kaya kung ako sa iyo, lalayo na ako sa babaeng iyan. Matindi pa sa kamandag ng ahas ni Valentina ang kamandag ng babaeng iyan. Mag-iingat kayo, pogi.”
     “Isa ngang manloloko si Trish,” pagtatanto ni Reed. Gusto niya sanang sabihin kay Ivan ang kanyang nalalaman ngunit palagay niya ay hindi pa ito ang tamang pagkakataon.
     Kinagabihan, sa kanilang bahay, ay nakita niyang malungkot si Benjo. Lumapit siya rito.
     “Nasaan na yung singsing ko?” tanong ni Benjo.
     Nagulat si Reed, “Ha?” Saan niya nga ba nailagay ang singsing? Hindi niya na matandaan.
     Sumama lalo ang loob ni Benjo, “Kinuha mo na nga, winala mo pa. Ang galing mo rin, ano?”
     Ngayon lang niya narinig na ganito ang tono ni Benjo. Kadalasan kasi kapag kinakausap siya nito ay nagpapakita ito ng paggalang ngunit ngayon ay iba. Hiyang-hiya tuloy siya at tanging nasabi ang,
     “Babayaran ko na lang.”
     Umiling si Benjo, “Terible ka. Sinisira mo talaga ang kaligayahan ko.”
     “Benjo naman, ‘di ko naman sinasadyang mawala yun.”     “Huwag mo akong kausapin, galit ako sa iyo!” Iniwan niya si Reed.
     Nang matutulog na sila, hindi nakita ni Reed ang pinsan sa kuwarto. Naroon ito sa sofa at natutulog na pala. Kinumutan niya ang pinsan at kahit alam niyang tulog na ito ay kinausap niya ito.
     “Benjo, sorry nga pala kung nawala ko yung singsing mo. Alam kong mahalaga yun kaso ang tanga-tanga ko, nawala ko! Hindi ko talaga alam kung saan ko nalagay. Sorry!”
     At habang ito'y tulog ay kinuwentuhan niya ito,
     “Alam mo ba kahapon, nagpunta ako sa mall. Doon ko nalamang friendship ring lang yun. May nakita kasi akong tindahan na sa tingin ko ay pinagbilhan mo ng singsing. Kamukhang-kamukha kasi ng singsing mo yung mga singsing dun.     “Pero ‘di lang yun, nakita ko uli yung sinasabi kong kasama ni Trish. Naaalala mo pa ba? Tinanong mo nga sa akin kung boyfriend niya yun. Sabi ko ‘di ko alam. Nandoon na naman nga si Trish e!     “Alam mo ba Benjo, iyang si Trish niloloko lang pala niya si ‘van. Boyfriend niya pala talaga yung lalaking iyon!”
     Bumangon bigla si Benjo na ikinagulat ni Reed, “Talaga, Kuya Reed?” tanong nito.
     “Walang hiya ka! Gising ka pa pala!”     “Ipagpatuloy mo yung kinukuwento mo, kuya!”     “Yun nga. Sa madaling salita, two timer si Trish. Niloloko niya si ‘van.”
      At kinuwento niya kay Benjo ang lahat ng detalye, ang lahat ng nalalaman niya mula noong araw na makita niya si Trish sa mall hanggang doon sa nalaman niyang impormasyon kay Lex.
      “Ayokong niloloko niya si ‘van. Parang kapatid ko na kasi yun,” ang narinig ni Benjo mula kay Reed.
      Lumungkot ang mukha niya. Mukhang mas mahalaga pa para kay Reed si Ivan kaysa sa kanya at alam niyang gayun din para kay Ellie. Nakaramdam tuloy siya ng pagkamuhi sa gitarista ng kanilang grupo na kasing gulang niya. Third year na si Ivan samantalang si Benjo ay first year pa lang dahil nag-shift siya ng course. Ayaw niya na kasi ng Nursing. Pero pinipigilan niya rin ang nararamdaman niyang pagkamuhi. Hindi iyon dapat dahil si Ivan ay kanilang kaibigan at iyon ay isang bagay na kanyang pinahahalagahan.
     Sa kabila noon ay naisip din niyang tuluyan na ngang mawawala si Ellie sa kanya ngayon pa't nalaman na ni Reed na nagtataksil si Trish kay Ivan. Maaaring anumang oras ay umamin ang kanyang pinsan. Kapag nangyari iyon ay magkakaroon si Ivan ng mas mabigat na dahilan upang maganap na ang hiwalayan nila ni Trish.
     “Anong plano mong gawin? Magsusumbong ka kay Ivan? Kung oo, huwag mo nang balakin, Kuya Reed,” ang tanging pakiusap ni Benjo.     “Bakit? E niloloko na nga siya ni Trish.”     “Paano naman ako? Alam mong mahal ko si Ellie. Kapag nagkahiwalay na sina Ivan at Trish, paano na? Kukunin sa akin ni Ivan si Ellie. Ayaw mo ba talaga akong maging masaya, Kuya Reed?” Nangingilid ang luha sa mga mata niya. “Nawala na sa akin sina mama at papa, pati ba naman si Ellie mawawala na rin? O baka gusto mong ako na ang sunod na mawala?”
     Natakot si Reed sa mga sinabi ng pinsan, “Huwag kang magsalita ng ganyan, Benjo!”
     “Kung gayon, manahimik ka na lang. Huwag mong sabihin kay Ivan ang lahat ng alam mo. Puwede ba yun?”
     Masama man iyon sa kalooban ni Reed ay tinanggap niya kung ano ang gustong mangyari ng pinsan.

***

Chapter 23: Sentiments