TAHOooooo!

Tuwing alas diyes ng umaga dumadaan ang taho dito sa lugar namin. Lagi kong inaabangan yun kasi gustong-gusto kong kumain ng taho. Hindi naman hirap si manong sa pagtitinda kasi naka-pedal siya kung magbenta. Moderno na yata ang magtataho ngayon.

Minsan ay bumili kami ni mama ng taho. Nakatingin ako sa lalagyan ng taho habang ito ay sinasalok nang biglang magtanong ang nanay ko sa magtataho,

"Manong, anong sustansya ho ba ang makukuha sa taho?"

Kakamot-kamot naman si manong na sumagot, "Hindi ko alam e."

"Ay ganun?" sabi ng nanay ko, parang nalungkot kasi hindi nasagot ng magtataho ang tanong niya.

Hindi ba parang nakakalungkot naman, kasi nagbebenta si manong ng taho pero hindi naman niya alam ang sustansyang nakukuha dito, for the sake lang na makapag-hanap buhay siya. Siguro kailangan din siyang i-orient.

'Te, Pahinge :p

Nagpunta kami sa Minute Burger ng nakababata kong kapatid na babae. Bumili kami ng Double Minute Burger saka dalawang Iced Choco. Habang hinihintay ang order, may suggestion si pated.

pated: ate, kainin na lang natin habang naglalakad.

anyD: wag na, dito na lang natin kainin. nakakasura naman kumain sa daan.

pated: wag na.

anyD:: bahala ka diyan pag may nangalabit sayo tapos sasabihin, "ate, pahingi."

pated: (tawa) bahala ka, una na lang ako uuwi.

anyD: (naawa kay pated) sige na nga, habang naglalakad na lang natin kainin.

Naglakad na kami matapos maibigay sa amin ang inorder. Sa aming paglalakad, may dalawang gusgusing bata ang lumapit sa amin. Buti na lang ubos na yung kinakain ko.

bata 1: te, pahingi.

buong puso ko namang ibinigay ang plastic ng kinain ko.

anyD: o ito, ubos na.

aba, ang bata ma-choosy! tinuro ba naman ang iniinom kong Iced Choco.

bata 1: iyan na lang.

anyD: 'lol! bumili ka dun!

Dahil bigo na makuha ang kinakain namin, yung isang bata naman ang nag-try manghingi with matching hawak pa talaga sa akin.

bata 2: te, pahingi.

Dineadma ko lang sabay hawi sa kamay ng bata. Naglakad kami ni pated palayo.


***

Nang makalayo na...

anyD: kadiri. hinawakan pa ako nung isa.

pated: ate, ang tapang mo naman.

anyD: e baka kasi lapitan ka rin.

pated: di ba, yun din yung nanghingi sa atin nung nakaraan?

anyD: oo, kaya bilisan na nating maglakad. baka mamaya magtawag. saksakin pa ako nun.

pated: (tumawa)


Gusto ko lang naman ipagtanggol si pated sa bad guys. Baka kasi kulitin din siya kaya sinungitan ko na ang mga bata.

Female Urinal?!

Last night naglalakad ako sa may Coastal Road, malapit sa Coastal Mall, pauwi na ng bahay galing Christmas Party. Nagulat ako nang may madaanan akong Pink Urinal at may lumabas na babae.

Naisip kong naihi lang siya at dahil walang place, doon na lang siya umihi. Nang makita ko yung mukha, binabae pala. Inaayos niya pa yung zipper niya habang naglalakad.

Wala lang, nagulat lang kasi ako. Unusual kasi na makakita ng ganun at akala ko kasi babae talaga siya kasi ang haba ng buhok. Saka ngayon lang ako nakakita ng binabae na lumabas sa urinal. Minsan kasi pag nadadaan yung sinasakyan kong bus sa may Baclaran, puro lalaki ang nakikita kong lumalabas galing sa Urinal. :p

Maagang Pamasko

Minsan pala may benefit din ang pagiging antukin ko.

~anyD


Maaga palagi ang gising ko dahil alas siyete ang start ng klase ng mga batang tinuturuan ko. Dapat alas singko or before 5:30 am pa lang nakaalis na ako ng bahay kung ayaw kong uminit na naman ang ulo ko dahil sa traffic na gawa ni Vergel Aguilar, mayor ng Las Piñas. Wala kasi siyang ibang ginagawa ngayong kapaskuhan kundi ang magbakbak ng kalsada, ang tagal-tagal namang ayusin. Dalawang araw nang sumasakit ang paa ko kalalakad dahil sa mga sasakyang ayaw umusad. Naka-heels pa naman ang lola mo.

Kaninang madaling araw e sumakay ako ng FX papuntang Manila. Doon ako pinasakay ng barker sa gitna. Buti nga di siksikan kasi ang liliit ng katawan namin. Hirap talaga maging sexy. Apat kami. Sa kaliwang dulo e babae, Nursing yata ang course, ako, tapos yung katabi kong lalaki at sa kanang dulo e lalaking matanda na.

Pagkabayad ko ng pamasahe e napapikit ako, tulog agad. Malayo-layo na pala ang byahe nang magising ako kasi naalimpungatan ako, nag-para kasi yung katabi kong lalaki. Bumaba muna yung matandang lalaki para magbigay daan sa lalaking bababa. Pag usog nung katabi ko, nakakita ako ng 100 pesos sa upuan. Gusto ko sanang ihabol yung 100 pesos pero nakababa na siya at yung matandang lalaki naman ay sumakay, sabay sakay ng isang bagong pasahero, tapos ay isinara na ang pinto. *BLAG!* Walang nakapansin sa pera maliban na lang dun sa babaeng nasa likuran, mukhang nakita rin niya at may pagnanasa din yata kay Roxas.

Nagdalawang-isip pa ako na kunin yung pera, pero naisip kong sayang naman kung mapupunta lang sa maling kamay. Iniisip ko rin kung pera ko nga ba ito baka nahulog sa kanang bulsa ko pagdukot ko ng cell phone, o pera ba talaga ng katabi ko. Nag-analyze akong mabuti. Wala naman akong nilagay na perang papel sa kanang bulsa ko kasi puro barya at cell phone lang ang nilagay ko doon at 200 pesos lang ang inilabas kong pera. Yung 100 na isa, nasa bulsa ko, yung isa pa, ipinambayad ko sa driver. Inilagay ko pa yung mga perang papel sa kaliwang bulsa kasama ng panyo. Mukhang pera nga talaga ito ng katabi ko. Iba rin kasi yung pagkakatupi.

Pagbaba nung babae sa likuran, kinapa-kapa ko yung upuan. Ang sama ko ba? Pababa na rin kasi yung katabi kong babaeng Nursing student kaya no choice kundi kunin, saka pababa na rin yung katabi kong matanda. At yun nga, nasa akin na yung pera, nandun sa bag ko, hindi ko pa ginagalaw. Wala din naman kasi akong paggagamitan nun.