Hide and Seek (Isang Pagsilip)

May kakaiba sa nilipatang lugar ng pamilya ni Joel. May lihim na itinatago. May misteryong ikinukubli. Di pangkaraniwan ang kasaysayan ng lugar na iyon. Takot ang mga tao. Wala nang gustong lumabas pagsapit ng alas diyes ng gabi. Hanggang alas nuebe lang naglalaro ang mga bata. May curfew raw kasi ayon sa mga tanod. Araw-araw binabakuran ang isang parte sa nasabing lugar. Gabi-gabing may nagpapatrolya. Gabi-gabi kasing may sumisira sa bakod. May mga batang nawawala na sa kasamaang palad ay hindi na natatagpuan. May isang bahay na taun-taon ay tinitirhan at taun-taon ding inaalisan. Kinatatakutan ang bahay na iyon dahil may batang umaaligid doon. Sino siya? Ayaw magsalita ng mga kapit-bahay. Tikom din ang bibig ng mga tsismosa sa lugar. Puwede kang tumakbo pero hindi mo siya matatakasan. Makakapagtago ka pero tiyak, maya-maya lang, nasa tabi mo na siya. Minsan nga ay nakakasalamuha mo pa siya nang hindi mo nalalaman. Gusto mong makiusyoso? Tara, sumama ka, maglaro tayo ng tagu-taguan sa ilalim ng liwanag ng buwan.